مرکز مطالعاتی تبریز یک سایت دیگر با وردپرس فارسی
گونئی آذربایجان قوزئی آذربایجان‌دا باش وئره‌ن حادثه‌لری یاخین‌دان ایزلدیی کیمی، تورکییه ایله ده درین‌دن ماراق‌لانیر. «عصرین فاجعه‌سی» آدلاندیردیغیمیز بو زلزه‌له بیز آذربایجان‌لیلاری کدره قرق ائتدی. تورکییه ایله دویغوسال باغلاریمیز وار و باش وئره‌نلردن مطلق شکیل‌ده تأثیرلنیریک. ایندی ده الیمیزدن گلنی اسیرگمیر و قارداش-باجیلاریمیزا کؤمک ائتمه‌یه چالیشیریق. بو سؤزلری Axar.az-آ گونئی‌لی فعال و آراشدیرماجی بابک شاهید دئییب.
«زلزه‌له‌دن سونرا بیز معنوی دستییمیزی نماییش ائتدیردیک، عینی زامان‌دا مادی یاردیم دا گؤستردیک. گونئی آذربایجان‌لیلار اوزونتولرینی، باشساغلیغینی، تورکییه ایله بیر اولدوقلارینی کوتلوی شکیل‌ده، یورولمادان سوسیال مئدیادا پایلاشیردیلار. بو حادثه‌نی دونیانین دقتین‌ده ساخلاماق اوچون بؤیوک فعال‌لیق نماییش ائتدیریردیلر. «تراکتور» و «آلومینیوم آراک» فوتبول کومانداسینین اویونو زامانی ایستادیون‌دا «سئوینجینیز سئوینجیمیز، آجینیز آجیمیزدیر» سؤزلری یازیلمیش بؤیوک بیر تورک بایراغی آسیلدی. میدان‌دا «آذربایجان وار اولسون، تورکییه باشین ساغ اولسون!» شعارلاری سسلندیریلدی». او، همچینین، گونئی‌لیلرین دستک مقصدلی فعالیتلریندن ده دانیشیب:
«تورکییه‌نین تبریز و اورمییاداکی کونسوللوقلاری تویتتئر حسابین‌دان یاردیم کامپانییاسی ایله باغلی چاغیریش ائد‌ن کیمی گونئی‌لیلر بونا بیگانه قالمادی. زلزله بؤلگه‌سینه لازیم اولان لوازیماتلاری گؤندرمک ایسته‌یه‌ن مینلرله اورمییالی و تبریزلی کامپانییایا قوشولدو. میللی فعاللار و گونئی‌لیلر آز کئچممیش کونسوللوغون قارشی‌سینا توپلاشیب، اؤز یاردیم پایلارینی چاتدیرماغا چالیشیردیلار. زلزه‌له‌دن ضرر چکه‌نلره یوزلرله ادیال، ایستیلیک قورغولاری و باشقا ضروری ماللار گؤندریلدی. هر ایکی کونسول ویدئومراجعت ائد‌رک، دسته‌یه گؤره گونئی آذربایجانا تشکر ائتدی. یاخین زامان عرضین‌ده بو یاردیملارین تورکییه‌یه چاتدیریلاجاغینی بیلدیردی».
قایناق: آخار آذ اینترنت سیته‌سی
